عزف منفرد علي النحو والصرف المغطي والمكشوف

------------------

أحيانا الواحد مخه مش بيطلع بطيخ بس
دا ممكن الواحد يطلع مخة سبانخ خالص
ده إن ماطلعش بدنجان مبذر كمان
ولاّ أقولكم بلاش الخضار اليومين دول
عشان الدنيا حر
ودرجة الحرارة إرتفعت علي مستوي الكرة الأرضية

وطبعا الخضار إللي عندنا
يدوبك تشتريه من هنا
و أول ما توصل للبيت تلاقيه ضرب
وهذا يدل علي قدرتنا الفائقة علي تبويظ أي شيء
وعمل إللي ما اتعملش قبل كده

واوعوا حد يقولي عشان مسقي بمياه المجاري
أنا دلوقتي عرفت ليه الليمون بقي غالي

ولأني هنا باتكلم عن النحو والبلاغة و الصرف
فأي واحد مش بيفهم الحاجات دي كويس
بيبقي قرفان
لأن الصرف عنده مش مظبوط
لأن مخه بيبقي عايز يتسلك

أما إللي بيقعد يقزقز في النحو
لحد ما الإمتحان ما وقته يعدي
ده يبقي عايز يتلب علي قفاه

ومخه لحـْس بالجامد خالص
يعني نضيف زي الصيني بعد غسيله

إيه إللي جاب سيرة الصيني و الصين دلوقتي بس

وعموما زي ما قلت وما زلت أكرر
مافيش حاجة إسمها سهل وحاجة اسمها صعب

ولكن فيه اختراع قديم إسمه المخ
وحاجات كده زي ما تقول إمكانيات وقدرات عقلية
وعلمية ومهلبية بالتفته البيضا والحمرا
وحاجات بالصلصة البيضا والتقلية
فهل نحن نملك هذا الشيء
أم إنه عند ناس وناس لأ
أم إنه موجود في بلاد الصين بس
إيه إللي جاب سيرة الصين دلوقتي بس يا جدعان

ولا هوّ المتعوس بيفضل متعوس
حتي لو جابوا له من بلاد الصين فانوس
وحطوه علي دماغه وولعوا فيه
قصدي ولعوا الفانوس

حتي الصين عملت لنا فوانيس
هم فكروا بمخهم واحنا ولعنا بفلوسنا
قصدي اشترينا الشمع والبطاريات منهم برضُه بفلوسنا
عشان ننور الفوانيس طبعا
إمال حانسيبها مضلمة
دا حتي يبقي شؤم

وكل واحد حر في ماله
منك لله ياللي في بالي
إيه إللي جاب سيرة الصين دلوقتي
وليه فكرتوني بيها بس

وبعدين عايز أسأل سؤال
وعايزكم تجاوبوني عليه

فيه واحد صيني ما يعرفش اللغة الصينية
حتي ولو كان مولود في مصر

أو واحد سنسكريتي ما يعرفش اللغة السنسكريتية

أو لاموآخذة حمار
متشحتف ومهدود حيله ليل ونهار
ما يعرفش لغة الحمير بتاعتهم
سواء كان بيجر كارو بعجلة خشب أو كاوتش
بلاش الحنطور لأن الحنطورما بيجرهاش حمير
طبعا أنا جبت سيرة الحمير
احتراما وتقديراَ لهم ولمواهبهم
اعترافا بكدهم وعملهم الدؤب في صمت
لأنهم الآن فئة ليست بالقليلة
ويجب أن نعمل لهم ألف حساب
حتي نتقي شر أصواتهم
وبالتالي يمكن استخدام مواهب أصواتهم عند اللزوم

وبعدين فيه ناس لسة بتطالب بتغيير طرق التدريس
إللي بقي لنا قرون بنطالب بتغييرها
وماحدش يفهم قرون علي مزاجه ويفسرها علي هواه
ولكن يجب أن تفهمها من سياق الكلام

وعلي فكرة الكل من زمان من أيام الهكسوس
ومن أيام حرب المعيز
ومن أيام داحس والغبراء إللي أنتم عارفينهم أكتر مني
لأني أسمع عليهم بس
لأني أنا كنت لسه ما إتولدتش
وطوال هذه القرون
الكل يطالب بتغيير طرق التدريس
طرق التدريس وما حدش يفهمني غلط

عموما المدارس عايزة تتغير
والمدرسين عايزة تتغير
والطلبة عايزة تتغير
والطرق عايزة تتغير
والصرف عايز يتغير
ما شاء الله ماشاء الله يعني كله عايز يتغير

بقول لكم إيه !!!!
ما تيجوا نجيب دولة تانية من الصين
ونقعد نتفرج عليهم ونشوفهم بيشتغلوا إزاي
وبيتعلموا إزاي و حا يعملوا إيه
واحنا مانعملش حاجة
علي الأقل ناخد نفسنا شوية
ونستريح حبتين
ونشم شوية هوا حلوين ونضاف
قبل ما كل حاجة تتلوث
لأننا فعلا تعبنا خالص
من الجهد المضني في عدم إعمال العقل والتفكير
وعدم بذل أقصي ما عندنا من جهد
وهذا ما جعل الصينيين تقلدنا عكسيا وييجوا يشتغلوا عندنا
وأهي فرصة نخلي الصينيين يشتغلوا شوية بدلا منا
قال إحنا يا عيني مموتين نفسنا في الشغل
وبنشتغل بذمة وضمير مش موجودين عند حد في العالم
*****
وبمناسبة الصين والقمة الإفريقية
وكما ذكرت الجزيرة
قال مفوض الشؤون الاقتصادية بالاتحاد الأفريقي ماكسويل مكويزالامبا
إنه يجب على أفريقيا أن تتحول أكثر فأكثر نحو الصين
كشريك للتنمية
ياااااااااااااااحلااااااااااااااااااااااااوة
ولسسسسسسسسسسسسسسسسسسسسسسسسسه

ففي العام الماضي
تعهدت الصين بتقديم عشرة مليارات دولار قروضا ميسرة لأفريقيا
على مدى الأعوام الثلاثة القادمة
كما أنها تقوم بضخ أموال في مشاريع لتطوير البنية التحتية
في دول كثيرة بأفقر قارة في العالم.

مش بقولك منك لله ياللي في بالي
فكرتني بالصين
والغريب إن الدول الغربية غيرانة وزعلانة
واحنا ولا علي بالنا
وعلي رأي واحدة خبيرة لها خبرة طويلة في التقل
(إعمل تقيل يجيلك ذليل )
واحنا طبعا ملوك التقل
تقال قوي قوي قوي زي خ .....

وحا اسيبهم يجربوا نار الغيرة يا نشأت – كما في الإعلان -
وتقول هذه الدول الغربية كما ذكرت الجزيرة
إن الصين مهتمة فقط باستخراج الموارد الطبيعية من أفريقيا
لدفع اقتصادها ( أي اقتصاد الصين )
وإنها لا تولي اهتماما يذكر للتنمية الأفريقية،
يعني كل واحد بيعمل لنفسه
وإحنا ما زلنا مستنيين من يعمل لنا
ده غير إللي بيتعمل فينا
ولسه بنتكلم عن حبنا وعدم حبنا للنحو
والصرف المغطي والمكشوف

منك لله يافطنة

مش قلتلك يافطنة بلاش تفكريني بالصين
وخلينا في النحو أحسن
دول بيجيبوا العروسة جاهزة يا فطنة من مجميعه
ولو عايزها حامل ما فيش مانع
المهم تاخد الختم علي قفاك وخلاص
منك لله يا فطنة
غطينني يا فطنه وصوتي
وإوعي تقولي لي صوتي مبحوح
ومش قادرة اتكلم ولا أرد
خلاص يا فطنة

غطيني يا فطنه والطمي
بس بلاش تلطمي علي وش إللي حنبك
أحسن يغطوكي أنت كمان
ومايلاقوش حد يصوت علينا إحنا الأتنين !
فيجيبوا لنا واحدة تصوت وتلطم علينا من الصين
وابقي خدي علي قفاك من جهلك في النحو والبلاغة
والصرف المغطي والمكشوف

مشكورر استاذ فهمى على الموضوع
نفسى اعرف الغلط على مين
من الطلابة ولا المدرسين
ولا ..................
التعليم بئا مجرد حشو للمخ نحشى مخنا كل سنة وبمجرد الخروج من الامتحان
ولا اكننا درسنا حاجة
يعنى يقولوا التعليم تراكمى وهما اصلا مش بيطبقوا النظام دا طول السنة
لالالالالالالا بلاش اظلم حد حرام
هما بيطبقوه فالامتحان اخر العام
ولا المواد العلمية زى الكيمياء والفيزياء
الحمد لله كله اتحول لنظرى على الورق وبس يعنى من الاخر لازم تفهم من غير تجارب
احفظ الخطوات والادوات والاستنتاج والملاحظة وروح كوبهم فالورقة
وانتهينا
وفالاخر يقولوا انتوا مش بتفهموا طيب نفهم ازااااااااااااااااااااااااى بس
فوضت امرى ليك يارب فالدنيا دى

------------------

hala eid كتب:: مشكورر استاذ فهمى على الموضوع
نفسى اعرف الغلط على مين
من الطلابة ولا المدرسين
ولا ..................
التعليم بئا مجرد حشو للمخ نحشى مخنا كل سنة وبمجرد الخروج من الامتحان
ولا اكننا درسنا حاجة
يعنى يقولوا التعليم تراكمى وهما اصلا مش بيطبقوا النظام دا طول السنة
لالالالالالالا بلاش اظلم حد حرام
هما بيطبقوه فالامتحان اخر العام
ولا المواد العلمية زى الكيمياء والفيزياء
الحمد لله كله اتحول لنظرى على الورق وبس يعنى من الاخر لازم تفهم من غير تجارب
احفظ الخطوات والادوات والاستنتاج والملاحظة وروح كوبهم فالورقة
وانتهينا
وفالاخر يقولوا انتوا مش بتفهموا طيب نفهم ازااااااااااااااااااااااااى بس
فوضت امرى ليك يارب فالدنيا دى

الغلط علينا كلنا

مافيش حد مش غلطان
واللي يقول غير كده كداب
وانا قلت في موضوعي

الكل يطالب بتغيير طرق التدريس
وقلت وأنا أعي ما أقول
وأتحمل مسئولية أي كلمة أقولها

قلت

عموما المدارس عايزة تتغير
والمدرسين عايزة تتغير
والطلبة عايزة تتغير
والطرق عايزة تتغير
والصرف عايز يتغير
ما شاء الله ماشاء الله يعني كله عايز يتغير
هذا ما قلته

أما الكيمياء والفيزياء
بكل صراحة وأمانة
يجب ألا تدرس إلا بمعامل حديثة
يتم فيها محاكاة الواقع
و تشوفي التفاعل أو التجربة وهي بتحصل
دون أن تجريها بنفسك
وكانك انت التي تقومين بإجرائها

أو تجري التجربة بنفسك
وتدوني النتائج بنفسك
وبذلك ينتهي الامتحان العملي

ولكن المدرسين بيحاولوا يوصفوا لك هذا الواقع
ويقربونه لك
وكل مدرس علي قد تقريبه
وطريقة تفننه في وصف ذلك
ومدي حبه لمادته
ومهارته وقدراته في استخدام الأدوات المتاحة

وأنا أول واحد أطالب بإلغاء امتحان النظري في العملي
وللعلم أنا أحيانا اشرح النظري بالعملي
ليس شرطا إجراء تجربة
ولكن باستخدام أشياء محسوسة أو مرئية
تجعل المادة الجافة ممتعة
ليس في كل الأوقات
ولكن حسب الإمكانيات المتاحة
وللأسف الشديد من يعمل يتساوي مع من لا يعمل
وهذه آفة يجب القضاء عليها
وهناك حلول كثيرة ولكن الأمر ليس بيدي
ولكني في موقعي لا أملك إلا شرف المحاولة

المفروض الطالب يجري التجارب بنفسه
ويرصد نتائجها بنفسه
ويكون التقدير علي النتائج
وبذلك ينتهي امتحان العملي ويتم تقديره
ليس علي حفط خطوات العمل
ولكن علي ما توصلتي إليه من نتائج

ولذلك أطالب بأشياء كثيرة
لأن هناك ثورة بمعني الكلمة في المعرفة
وتطور هائل في المعلومات
ولذلك يابنيتي لا أستطيع أن أغير الكون
وبما أننا لا نستطيع
لا أنا ولا انت ولا مدرستنا كلها
فلنحاول أن نتقن ما بين أيدينا قدر ما نستطيع
ولنحاول أن نعمل زي الشاطرة
التي لا تتحجج
ولكن يمكن ان نغزل برجل حمار

وبعدين مين قال إنكم مش بتفهموا
أمال إحنا بنعمل إيه طول السنة
بنبيع لفت ولا بنخرط بصل
بلاش كلنا كمعلمين
ولكن بعضنا بكل صدق وأمانة بنحاول نفهمكم
وكل واحد علي قد فهمه هو
وليس فهمي أنا

معااااااك يا مستر وبجد اكييد كلنا نتمنى ان دة يحصل.....
وزى ما حضرتك قلت ان الغلط مش في الطلبة بس او في المدرسيين بس ...
اكييد العيب من الجهتيين
بس حضرتك مش شايف ان دة من الصعب شوية انة يتحقق ف ظل نظام التعليم الفاسد
مش التعليم بس اللى فاسد
وبس كفاية كدة لحسن اورح المعتقل ويقولو عليا ارهابية
عزف منفرد علي النحو والصرف المغطي والمكشوف 898330

عزف منفرد علي النحو والصرف المغطي والمكشوف 898330

وسعتها يا مستر اكيد مش حنكر دور حضرتك فى مساعدتى ف دة هههههههههه

------------------

دينا احمد كتب:: معااااااك يا مستر وبجد اكييد كلنا نتمنى ان دة يحصل.....
وزى ما حضرتك قلت ان الغلط مش في الطلبة بس او في المدرسيين بس ...
اكييد العيب من الجهتيين
بس حضرتك مش شايف ان دة من الصعب شوية انة يتحقق ف ظل نظام التعليم الفاسد
مش التعليم بس اللى فاسد
وبس كفاية كدة لحسن اورح المعتقل ويقولو عليا ارهابية

وسعتها يا مستر اكيد مش حنكر دور حضرتك فى مساعدتى ف دة هههههههههه

ليس شرطا أن نتفق في كل شيء
وليس صحيحا ولا صحيا أن نختلف في كل شيء
بل يجب أن تكون هناك نقاط يجب أن نتفق عليها
وليس صحيحا ولا صحيا أيضا
أن أظل جالسا في مكاني
وأتهم الناس بما يمكن أن يتهمونني به
وبما هو أكثر بكثير مما أتهمهم أنا به
وزي ما قلت قبل كده مليون مرة
مافيش حاجة أسمها سهل و حاجة إسمها صعب
فما هو بالنسبة لنا صعب الآن
يمكن أن يكون سهلا اليوم أو غدا أو مستقبلا
ولكن فيه حاجة إسمها مخ
فهل نحن نملك القليل منه
وما نسبته عندنا
وكيف يمكن زيادة هذه النسبة لدينا
وبعدين بلاش استخدام ألفاظ مثل المعتقل وأمن الدولة
والتي لا نسمع عليها
إلا من ذوي الإحتياجات الخاصة
لأن مثل هذه الألفاظ لا يصلح ولا يصح معها هزار
ولايجب إقحامها في كلامنا عمال مع بطال
فلنقل رأينا بكل شجاعة والتزام
بعيدا عن الأمراض النفسية
والعقد الداخلية والأسباب الشخصية
وما يتبعه من السباب أو الشتائم
أو ترديد أي كلام يصل لأسماعنا ونحن لانعرف عنه شيئا
أو تقليد بعض الناشطين السياسيين
الذين كما قلت من قبل
لايضعون علي أكتافهم هموم هذا الوطن
أومسئولية عمل أي شيئ يفيد الناس
ولكن يضعون علي أكتافهم كوفية كاروهات حمرا أو زرقا
أو مخططة زي بتاعة أخونا شلبي
ويربطون رؤسهم بشريط أحمر أو أخضر
وربما تتغير الموضة إلى شريط فسدقي بالترتر
زى بتاع عروسة المولد
ويجلسون علي مقاعد وثيرة وفي أجواء مكيفة
يقلبون أوجاع الناس فقط
ويوغرون صدورهم علي بعض
ويزيدون بينهم حدة الشقاق
وينضحون بما لديهم من نفاق
ولا يقدمون حلولا لمشاكل الناس
ولايزيدونهم إلا هما وغما ونكدا
ويتحدثون فقط عن الديمقراطية والإشتراكية والتقدمية
وهم لا يعرفون حتي معاني هذه الكلمات التي يبخونها
ولا يعرفون أيضا الفرق بين السبانخ والملوخية
سواء كانت بالأرانب أو بالتقلية
لأنهم يفرون رعبا عندما يقفز أي أرنب
حتي ولو كان بعيدا عنهم وليس له دخل بهم
لذلك فهم لا يستطيعون أن يفعلوا شيئا له أهمية
إلا أن يلقوا بكل عقدهم وآرائهم وسط الزحام والضجيج
فلا يُسمع منهم ولامما يقولون شيئا سوى قعقعة
ولا تري لهم أثرا ولا طحينا
ولذلك يجب علينا أن نتقن ما بين أيدينا
ولا نتهاون في تأدية واجباتنا
حتي لانتهم بأننا مهملون وإنهزاميون
وحتى لا يقال بأننا لا نفهم أو نعي ما نقول
وبعد ذلك يمكن أن نعرض رأينا بكل شجاعة وثقة
وحينها سيكون رأيا سديدا وله قيمة وأثرا

» لو كان النَّحْوُ رجلاً لَقَتَلْتُه!!!
» مدخل إلى علم النحو
» النحو للصف الثانى الثانوى
» منهج النحو كامل للصف الثانى الثانوى
» منهج النحو للصف الثانى الثانوى بطريقة شيقة ومنسقة