البت باتعة .. والفيس بوك

------------------

الفيس بوك

الفيس بوك مشهور شهرة عالمية
وهو سلاح ذوحدين

فلو أنت بتفهم كويس
حاتعرف تستعمله و تستغله صح

وحاتعرف تخرط بيه البصل
وتبقي ريحتك لا موآخذة ""صنة ""
ال ""صنة "" هي ريحة البصل
مش حاجة تانية

أو تدلع بيه نفسك
وتمشي زي قرن البامية الشايخ
اللي ماحدش راضي يقمعة
لأنه ما ينفعش يتقمع
ولا ينطبخ ولا يستوي
ولا حتي يترمي في الزبالة
اللي ماحدش عارف يلمها

ولو انت مش بتفهم
وحا تعمل زي البت باتعة
فأقل حاجة حا تعملها
إنك حاتعور نفسك تعويرة سودة
تستنزف دمك لو عندك
ووقتك لو فيه
وعقلك إن وجد
وتضحَّـك الكرة الأرضية عليك

وبالرغم من ذلك
قد تجد البعض حايعور نفسه مائة تعويرة
ومش حايخر ولا نقطة دم
لانه كثيرا ما يتفرج علي فيلم
جفت العروق
قصدي جفت الدموع

وبدلا من أن يصاب الإنسان بحمرة الخجل
فإنه أصبح يصاب بخضرة المجاري

أي الخضار الذي يصيبه بالمرض
لأنه مسقي بمياه المجاري
وارجو الا يلطشها أحد سارقوا مجهود الآخرين
وينسبها لنفسه لانها من اختراعي

وحايمشي في الشارع
وعنيه باظة علي طول
و مش حاسس بنفسه
وكأنه خد حقنة بنج طويلة المفعول
وحيفضل ينهج ولسانه حايبقي متدلدل
زي لسان لاموآخذة ...
ويتبهدل ويتشحتف
وفي ألآخر يقعد يعيط جنب الحيط

ومش حيلاقي حد يقول له معلش ياروح تانت
ولا يديه حتة قطنة
ولا حبة ميكروكروم
ولكن ممكن يديه علي قفاه !!

ولو صعب عليه و قال له حاجة
مش حايقول له حتي معلش وتاخد غيرها
وآدي نتيجة لعب العيال
واللي يمشي وراهم
ولكن حايقول له أمشي يا بابا إلعب بعيد

الفيس بوك عايز مجموعات معينة
وعايز وعي وحس عالي
وعايز ناس بتفهم
وعارفة هي بتعمل إيه
و بتتفق علي شيء معين

ممكن يكونوا بيدعوا إلي فكرة معينة
أو ليهم هدف عايزين يحققوه
أو مشروع زي ما يسموه يسموه
أو إعلان أو تجارة أحيانا

وطبعا ليست كل الأفكار طيبة ولا حسنة
ولا كل الأهداف نبيلة و سامية
نبيلة وسامية صفات وليست بنات

وأحيانا كثير تكون غير مناسبة لنا
ولا لسلوكنا ولا لديننا ولا لأخلاقنا
ولا تتفق مع الأصول
ولا مع الأعراف السائدة أو المتنحية

فإذا دخلت علي الفيس بوك
فأنت تدخل لهدف ما أو لغرض معين
أو لحاجة في نفس يعقوب

ولكن أغلب اللي بيدخلوا عليه
أما فاضيين
وزهقانين ومخهم فاضي
ونفوسهم مخوخة
وعقلهم بعيد عن الجميع ممشش

ودماغهم مليانة بالفراغ
العلمي والثقافي والإجتماعي والإنبعاجي
والنصف قاري
وأحيانا تكون صحاري أدمغتهم
مليئة بأعشاب السافانا الجافة
التي تكثر فيها الزواحف والقنافذ والشوكيات
وفي أغلب الأحوال
تكون مليئة بالنباتات المتسلقة
علي حوائط الوهم والخزعبلات
التي تحد من انطلاق الأفكار ووضوح الرؤي
والذي تجعلهم ينامون بالليل
ولا يصحون يالنهار
فلا يفرقون بين الشمس و القمر
ولا بين الليل و النهار
لان سنينهم بقت لون حبة البركة
اللي قلت خالص وتكاد تكون معدومة
تضامنا مع انعدام الضمير
وانعدام حاجات كتير
فلا يعرفون الألف من كوز الذرة
إللي ماحدش لاقيه
بعد ما عملوه شيبسي درة وفشار

ولا هم لاقيين أي حاجة يعملوها
لأنهم أكيد ما يعرفوش يعملوا حاجة
فأصبحوا لايفرقون بين المجتهد و النصاب
وبين المحترم وأبو وش مكشوف
ولا يعرفون الفرق بين الحداية والفيل أبو زلومة

وبالتالي تجد العجب
وتجد أشياء وصور وكلمات
لا تجعلك تخرج منه
إلا و أنت مصاب بصدمة نفسية
أو لوثة عقلية
أو تصلب في الشرايين
أو ضمور في العصب الثمبساوي
إللي أنا باسمع عليه أحيانا من بتوع الأحياء
واللي علميا بيقولوا عليه
أنه يعمل لا إراديا
وإنه السبب في زيادة حمرة الوجه المفرطة
دون أن يكون هناك إدني إحساس بالخجل

أما الذي يدخل علي الفيس بوك لأول مرة
فده بالضبط زي اللي أول مرة يدخل سينما
والنور راح مطفي

ولاننا نتعامل يوميا مع الكهرباء
فإن البعض يعتقد إن ده مقلب بارد
من شركة الكهرباء
أللي تمللي تقل بإصلها
وتقطع عليهم النور

وعشان تغيظهم أكتر
بتخلي لمبات الشوارع في عز الظهر منورة
وتطفيها بالليل
ده غير ما بتقطعها ليل ونهار في البيوت

لدرجة ان بعض الناس
من كتر ما عانوا من انقطاع الكهرباء
والماء وانقطاع نَفَسْهم
وانقطاع كل شيء
اعتقدوا إن مسئولي الكهرباء ضغطهم عالي
عشان كده بيوطوا الضغط

وانهم حبوا يعكننوا علي الناس
حتي في يوم اجازتهم
و فضلوا وراهم حتي وهم في السينما
وعشان كده سابوا لهم الفيلم و مشيوا

وهناك من يعتقد إن دخوله هذا الموقع
نوع من الوجاهة والشياكة
وأنه سيجعل منه رجلا عصريا
وشخصا حضاريا
وهو يا حبة عيني
ما بيعرفش يلبس القميص إلا بالمقلوب
و بيبقي مشحوط عليه من ورا
وبدل ما يخلي البنطلون نازل من وسطه
يخليه يدوبك لحد رُكـَبُه
ويعمل لي فيها ستايل
وهو لا ينفع لا شكلا ولا مضمونا
ولا يرضي أن يشتريه بتاع الروبابيكيا

لأنك لو زقيته بإصبعك لوقع متكسرا
كما يقع الطبق الصيني علي البلاط
مش عارف ليه الصين بتطاردني اشباحها
ودايما يطلعلوا لي الدور الثالث
يخبطوا علي الباب وإيدهم علي الجرس
ولا بتوع زوار الفجر زمان
ويقولوا لي معانا حاجات صيني كويس

مما يجعل ما تبقي لي من أبراج
في المخ وفي العمر تطير بلا أجنحة
فأصاب بحالة غليان
لا أفيق منها إلا وأنا أقف تحت الدش
الذي لا تنزل منه أي نقطة ميه
فاستجمع كل ماتبقي لي من قوة
و أصرخ ياللي تحت اقفلوا الميه
وانتظر وأنا يأكلني الغيظ
حتي تصعد المياه علي استحياء

فماذا تبقي
بعد ما عملوا لنا فانوس رمضان
وجابوا لنا العروسة
لأ وكمان وحياتك كاملة من مجاميعة
ولو عايزها حامل مافيش مانع كمان !!

فلا فرق بين أن تعمل
وتتعب نفسك وتتعلم وتعرف
وبين أن تبحلق بعنيك
وتمد رقابتك لقدام
وتفتح بقك زي البكابورت
اللي الصيَّع سرقوا غطاه
وباعوة لبتاع الروبابيكيا

أما إللي لسة جداد في الفبس بوك
وبيحبوا يستكشفوا أي حاجة في أي حاجة
قد يستمتعون به قليلا في الأول
وبعد كده يلطموا ويقلبوها محزنة
ويجب ألا يلومون إلا أنفسهم
فهؤلاء يكونون صيدا سهلا
ويأكلون الطعم بكل بلاهة وسذاجة
ولا يبدو عليهم أي انزعاج
بل تنتابهم حالة من التبلد والامبالاة
وعدم الأحساس بالمسئولية

طبعا مثل هؤلاء فيه كثير

وهم يوقعون أنفسهم في بلاوي و مشاكل
هم واللي حواليهم
من حيث لايدرون ولا يعلمون
ودول بيفكروني بالبت باتعة الغلبانة
إللي الظروف حاصرتها من كل جانب
و اتحطت فيها غصب عنها
وخلتها طول عمرها
ماشية قدام الجاموسة أو وراءها
عشان تعمل سماد بلدي

واللي فجأة النداهة ندهتها
وخلتها كسَّرت كلام أبوها وأمها
و صممت أول مرة في حياتها
تروح لوحدها محطةمصر

وحبت تعمل إنها من أهل البلد
وتلبس جيبه جينس قصيرة
من غير بنطلون سترتش بلون جلدها
ونسيت تحط المنديل أبو قوية
إللي كانت بتلبسة وهي ماشية ورا الجاموسة

ياتري النداهة
قصدي الفيس بوك
حايعمل معاكي إيه ياباتعة

ههههههههههههههههههههه
صح والله استاذ فهمى كلامك مضبووووووووط 100%

------------------

titoelstohy كتب:

أنت باين عليك بتعرف البت باتعة دي كويس
عشان كدة قلت الكلام مضبوط 100%

مش هي دي البنت اللي سمعت عن المانيكير
من الفيس بوك
وبدل ما تدهن بيه ظوافرها
دهنته في وشها

جميل يا استاذ فهمى بجد حاجات جامده جدا ودايمن تفاجئنا كده بكل شئ جديد وجميل وابداع رائع يفوق الحدود شكر ليك يا استاذنا الفاضل

شكرااااااااااااااااااااا

------------------

هادى شعبان كتب:

Eman_elsayed كتب:

شكرااااااااااااااااااااا

شكرا لكم أيها الشباب المستنير
وتحيية تقدير لكم
ولمروركم الجميل